(កំពង់ធំ)÷រដ្ឋបាលខេត្តកំពង់ធំ សូមជម្រាបជូនដំណឹងដល់បងប្អូនប្រជាពលរដ្ឋ មេត្តាជ្រាបថា ដោយផ្អែក លើស្ថានភាពបច្ចុប្បន្ន រលកកម្ដៅនៃអាកាសធាតុ មានភាពក្តៅហួតហែង រហូតដល់កម្រិតសីតុណ្ហភាព ចន្លោះ ៣៩-៤០ អង្សារសេ ដែលស្ថិតនៅកម្រិតឱ្យមានការប្រុងប្រយ័ត្នខ្ពស់។
ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ សូមប្រជាពលរដ្ឋ ដែល រស់នៅតាមបណ្តាក្រុង ស្រុក ក្នុងខេត្តកំពង់ធំ មេត្តាបង្កើនការប្រុងប្រយ័ត្នខ្ពស់ ក្នុងការប្រើប្រាស់ភ្លើងចង្ក្រាន ដុតទៀន ធូប នៅតាមផ្ទះសម្បែងរៀងៗខ្លួន ពិសេសការទុកដាក់ប្រេងឥន្ធនៈ ឧស្ម័នចំហេះ វត្ថុដែលងាយ ឆាបឆេះ ឬងាយផ្ទះដែលបណ្តាលឱ្យមានអគ្គិភ័យកើតឡើង, ត្រូវត្រួតពិនិត្យ ឬបិទចរន្តអគ្គិសនីមុនពេល ចាកចេញពីផ្ទះ និងត្រួតពិនិត្យឱ្យបានហ្មត់ចត់ និងបង្ការកុំឱ្យមានការឆេះរាលដាល បង្កើតជាគ្រោះអគ្គិភ័យ ដែលអាចបណ្តាលឱ្យបាត់បង់ទ្រព្យសម្បត្តិ អាយុជីវិត, កុំធ្វើស្រែប្រាំងជាលើកទី២ ជាពិសេសត្រូវប្រើប្រាស់ ទឹកដោយសន្សំសំចៃបំផុត និងរក្សាប្រភពទឹកទុកឱ្យបានគ្រប់គ្រាន់ដូចជា បឹង ប្រឡាយ ស្ទឹង អូរ សម្រាប់ផ្គត់ ផ្គង់ដល់ប្រជាពលរដ្ឋ សត្វ….ជាដើម ។ ប្រសិនបើមានគ្រោះអគ្គិភ័យកើតឡើងត្រូវរាយការណ៍ជាបន្ទាន់មក អាជ្ញាធរមូលដ្ឋានដែលនៅជិតបំផុត។
ទន្ទឹមគ្នានេះដែរ អាជ្ញាធរមូលដ្ឋានគ្រប់លំដាប់ថ្នាក់ត្រូវយកចិត្តទុកដាក់ ត្រៀមរៀបចំផែនការ អន្តរាគមន៍ និងត្រូវរៀបចំឡានទឹកឱ្យបានគ្រប់គ្រាន់ក្នុងការជួយសង្គ្រោះប្រជាពលរដ្ឋបានទាន់ពេលវេលា ។ ម្យ៉ាងវិញទៀត ត្រូវធ្វើការផ្សព្វផ្សាយ ណែនាំឲ្យប្រជាពលរដ្ឋយកចិត្តទុកដាក់លើសុខភាព អនាម័យ ដើម្បី ជៀសវាងជំងឺផ្សេងៗ។
អាស្រ័យដូចបានជម្រាបជូនខាងលើនេះ សូមបងប្អូនប្រជាពលរដ្ឋ និងសាធារណជន ទាំងអស់ មេត្តាជ្រាបជាព័ត៌មាន និងចូលរួមសហការ ជាមួយអាជ្ញាធរ ភូមិ ឃុំ សង្កាត់ ក្រុង ស្រុក ដើម្បីឆ្លើយតបនឹង គ្រោះមហន្តរាយរាំងស្ងួតនេះ ឲ្យបានទាន់ពេលវេលា និងមានប្រសិទ្ធភាពខ្ពស់៕
