(បន្ទាយមានជ័យ_ បាត់ដំបង)៖នៅថ្ងៃសៅរ៍ ១១កើត ខែមាឃ ឆ្នាំរោង ឆស័ក ព.ស.២៥៦៨ ត្រូវនឹងទី៨ ខែកុម្ភៈ ឆ្នាំ២០២៥ លោក អ៊ុច ហ៊ីង អគ្គនាយករង នៃអគ្គនាយកដ្ឋានកិច្ចការបច្ចេកទេស ក្នុងនាមតំណាងដ៏ខ្ពង់ខ្ពស់របស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងារបច្ចេកទេសនៃនាយកដ្ឋានសហគមន៍កសិករប្រើប្រាស់ទឹក ក្រុមការងារអន្តរាគមន៍នៃនាយកដ្ឋានធារាសាស្ត្រកសិកម្ម នាយកដ្ឋានវិស្វកម្ម និងមន្ទីរធនធានទឹក និងឧតុនិយម ខេត្តបន្ទាយមានជ័យ និងខេត្តបាត់ដំបង ព្រមទាំងអាជ្ញាធរដែនដី និងសហគមន៍កសិករប្រើប្រាស់ទឹក ចុះពិនិត្យជាក់ស្តែងស្ថានភាពទឹក និងការងារអន្តរាគមន៍បង្ហូរទឹកសង្រ្គោះស្រូវប្រាំងជូនប្រជាកសិករនៅស្រុកព្រះនេត្រព្រះ និងស្រុកបាណន់។
ក្នុងឱកាសនោះ លោកអគ្គនាយករង និងក្រុមការងារបានអញ្ជើញចុះពិនិត្យការងារអន្តរាគមន៍ នៅសហគមន៍ត្រពាំងថ្ម ស្ថិតនៅឃុំរហាល ស្រុកព្រះនេត្រព្រះ នៅភាគខាងចុងប្រឡាយមេលេខ១ ដែលត្រូវនាំទឹកពីអាងត្រពាំងថ្មក្នុងចំងាយប្រមាណ ៣២គីឡូម៉ែត្រ ដើម្បីយកមកស្រោចស្រពលើផ្ទៃដីស្រូវប្រាំងប្រមាណ ៣៥០០ ហិកតា ដែលគ្រោងនឹងប្រមូលផលនៅពាក់កណ្តាលខែមីនា ខាងមុខ។
ជាមួយគ្នានេះដែរ លោកអគ្គនាយករង និងក្រុមការងារក៏បានអញ្ជើញចុះពិនិត្យការងារអន្តរាគមន៍នៅសហគមន៍កង្ហតឈើទាល ស្ថិតនៅឃុំស្នឹង ស្រុកបាណន់ ដែលមានការខ្វះខាតទឹកចំនួន ៣៩២ហិកតា ហើយគិតមកដល់ពេលនេះ ការងារជួយសង្គ្រោះសម្រេចបាន ៣៧០ហិកតា។
ឆ្លៀតក្នុងឱកាសនោះ លោកអគ្គនាយករង បានណែនាំដល់មន្ទីរធនធានទឹក និងឧតុនិយមខេត្ត ត្រូវបន្តយកចិត្តទុកដាក់លើការងារអន្តរាគមន៍សង្រ្គោះស្រូវរដូវប្រាំងជូនប្រជាកសិករឱ្យបានទាន់ពេលវេលា ព្រមទាំងផ្តល់ការណែនាំដល់សហគមន៍កសិករប្រើប្រាស់ទឹក និងអាជ្ញាធរមូលដ្ឋាន ឱ្យចូលរួមលើការងារថែទាំ និងការគ្រប់គ្រងប្រព័ន្ធធារាសាស្រ្ត ដើម្បីឱ្យមាននិរន្តរភាពបានយូរអង្វែង ព្រមទាំងការប្រើប្រាស់ទឹកឱ្យមានលក្ខណៈសន្សំសំចៃខ្ពស់៕
