(កំពង់ឆ្នាំង)÷នៅរសៀលថ្ងៃចន្ទ ៥កើត ខែបុស្ស ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី១៥ ខែមករា ឆ្នាំ២០២៤ ឯកឧត្តម ប៊ុន ហ៊ាន រដ្ឋលេខាធិការក្រសួងធនធានទឹក និងឧតុនិយម ប្រធានក្រុមការងារសម្របសម្រួលការងារគ្រប់គ្រងធនធានទឹក និងឧតុនិយមប្រចាំខេត្តកំពង់ឆ្នាំង ខេត្តកំពង់ចាម និងខេត្តត្បូងឃ្មុំ រួមដំណើរដោយឯកឧត្តមថ្នាក់ដឹកនាំ មន្ត្រីជំនាញក្រសួង និងលោកប្រធានមន្ទីរធនធានទឹក និងឧតុនិយមខេត្តកំពង់ឆ្នាំង បានអញ្ជើញចុះពិនិត្យការងារអន្តរាគមន៍បូមទឹកសង្គ្រោះស្រូវរដូវប្រាំងនៅក្នុងភូមិសាស្ត្រឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង។
នាឱកាសនេះ ឯកឧត្តមរដ្ឋលេខាធិការ និងក្រុមការងារបានជួបជាមួយលោកមេឃុំគោកបន្ទាយនិងប្រធានសហគមន៍ត្រពាំងត្របែកពិភាក្សាលើការងារអន្តរាគមន៍សង្គ្រោះស្រូវរដូវប្រាំងជាបន្ទាន់ចំនួន ៥៥០ហិកតា និងលើកផែនការសម្រាប់អនាគត។
សូមបញ្ជាក់ថា បច្ចុប្បន្ននេះមន្ទីរធនធាន និងឧតុនិយមខេត្តកំពង់ឆ្នាំង បាននិងកំពុងអន្តរាគមន៍សង្គ្រោះបន្ទាន់ជួយដល់ប្រជាកសិករ តាមរយៈការស្តារប្រឡាយ ដើម្បីបូមទឹកពីបឹងធំទៅដីស្រែប្រាំង៕
