(កំពង់ធំ – សៀមរាប)÷សហប្រធាននៃក្រុមការងារបច្ចេកទេសចម្រុះស្តីពីកសិកម្ម និងទឹក(TWG-AW) ឯកឧត្តម អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម និងឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបន្តដឹកនាំទស្សនកិច្ចសិក្សាលើកទី២ របស់អនុក្រុមការងារបច្ចេកទេសគ្រប់គ្រងប្រព័ន្ធធារាសាស្ត្រ(sub-TWG-ISM) នៅប្រព័ន្ធធារាសាស្ត្រអង្គគោ ក្នុងខេត្តកំពង់ធំ ដែលមានការចូលរួមពីឯកឧត្តមថ្នាក់ដឹកនាំជាន់ខ្ពស់ មន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមខេត្តកំពង់ធំ ព្រមទាំងឯកឧត្តមថ្នាក់ដឹកនាំ មន្ត្រីបច្ចេកទេសក្រសួង និងមន្ទីរកសិកម្មខេត្តកំពង់ធំ សហគមន៍កសិករប្រើប្រាស់ទឹក និងអាជ្ញាធរមូលដ្ឋានជាច្រើននាក់ផងដែរ។
សូមជម្រាបថា ប្រព័ន្ធធារាសាស្ត្រអង្គគោ ស្ថិតនៅស្រុកកំពង់ស្វាយ ខេត្តកំពង់ធំ។ ប្រព័ន្ធធារាសាស្ត្រនេះបានសាងសង់ឡើងនៅឆ្នាំ១៩៤៧ និងបន្តស្តារជួសជុលឡើងវិញជាបន្តបន្ទាប់រហូតមក។ នៅក្នុងឆ្នាំ២០១១ ប្រព័ន្ធធារាសាស្ត្រនេះក៏ត្រូវបានសាងសង់ឡើងវិញដោយកម្មវិធីខ្សែសង្វាក់តម្លៃផលិតផលកសិកម្មកម្ពុជា-អូស្ត្រាលី/ Cambodia-Australia Agriculture Value Chain Program (CAVAC) រហូតដល់ឆ្នាំ២០១៥ ទើបបានបញ្ចប់ការសាងសង់និងបានដាក់ឈ្មោះថាប្រព័ន្ធធារាសាស្ត្រអង្គគោ។
ប្រព័ន្ធធារាសាស្ត្រអង្គគោមានប្រឡាយពីរគឺ ប្រឡាយមេនិងប្រឡាយរង ដែលប្រឡាយទាំងពីរមានប្រវែងសរុប ៨ ២២៣ម៉ែត្រ។ ប្រព័ន្ធធារាសាស្ត្រអង្គគោនេះមានស្ថានីយបូមទឹក ពីរកន្លែងដើរដោយថាមពលអគ្គិសនីនៅជាប់ស្ទឹងសែន មានសមត្ថភាពស្រោចស្រពលើផ្ទៃដីបង្កបង្កើនផលសរុបប្រមាណ ១០១៤ ហិកតា ក្នុងនោះស្រូវប្រាំងអាចស្រោចស្រពបានលើផ្ទៃដីមានចំនួន ៧១៥ហិកតា។ កិច្ចដំណើរការថែទាំប្រព័ន្ធនេះចាប់ផ្តើមមានតាំងពីឆ្នាំ២០១៥ ទទួលខុសត្រូវដោយសហគមន៍កសិករប្រើប្រាស់ទឹក ដែលមានសមាជិកសរុបចំនួន ២៦២គ្រួសារ។
នៅថ្ងៃដដែល សហប្រធាននៃ TWG-AW ឯកឧត្តម អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម និងឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមជាមួយថ្នាក់ដឹកនាំ និងមន្ត្រីបច្ចេកទេស នៃក្រសួងទាំងពីរ បានបន្តដំណើរទៅទស្សនកិច្ចសិក្សា និងស្វែងយល់ពីតួនាទីភារកិច្ច និងបញ្ហាប្រឈមនៅមន្ទីរធនធានទឹក និងឧតុនិយមខេត្តសៀមរាប ដោយមានការចូលរួមពីលោកប្រធានមន្ទីរ និងមន្ត្រីក្រោមឱវាទយ៉ាងច្រើនកុះករ។
គួររម្លឹកថា ក្រុមការងារបច្ចេកទេសចម្រុះស្តីពីកសិកម្ម និងទឹក (TWG-AW) ត្រូវបានបង្កើតឡើងដោយរាជរដ្ឋាភិបាលកម្ពុជាក្នុងឆ្នាំ២០០៤ ដើម្បីដើរតួជាអង្គភាពសម្របសម្រួល និងជាយន្តការពិភាក្សាភាពជាដៃគូរវាងរាជរដ្ឋាភិបាលកម្ពុជា ជាមួយដៃគូបច្ចេកទេស និងហិរញ្ញវត្ថុ (រួមទាំងម្ចាស់ជំនួយ) សមាគម និងអង្គការក្រៅរដ្ឋាភិបាលជាតិ និងអន្តរជាតិ។ គោលបំណង គឺដើម្បីរួមចំណែកដល់ការសម្រេចបាននូវអាទិភាពអភិវឌ្ឍន៍ជាតិដែលកំណត់ដោយរាជរដ្ឋាភិបាល។ បច្ចុប្បន្ននេះមានក្រុមការងារបច្ចេកទេសចម្រុះចំនួនជាង២០ កំពុងដំណើរការ៕
