ខេត្តស្ទឹងត្រែង, នៅថ្ងៃព្រហស្បតិ៍ ៤រោច ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៨ ខែមីនា ឆ្នាំ២០២៤នេះ ឯកឧត្តម សុត រស្មី រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយមបានអញ្ជើញជាអធិបតីក្នុងពិធីប្រកាសផ្ទេរ និងតែងតាំងមុខតំណែងថ្មីដល់លោក លំ សេរីគុត ជាប្រធានមន្ទីរធនធានទឹក និងឧតុនិយមខេត្តស្ទឹងត្រែង។
សូមជម្រាបថា ពិធីនេះមានការចូលរួមពីឯកឧត្តមថ្នាក់ដឹកនាំជាន់ខ្ពស់នៃក្រសួងធនធានទឹក និងឧតុនិយម ឯកឧត្តមប្រធាននិងលោកជំទាវសមាជិកក្រុមប្រឹក្សាខេត្តស្ទឹងត្រែង ឯកឧត្តមអភិបាលស្តីទី លោកអភិបាលរង នៃគណៈអភិបាលខេត្តស្ទឹងត្រែង ឯកឧត្តមប្រធានសាលាដំបូងខេត្ត និងឯកឧត្តមព្រះរាជអាជ្ញាអមសាលាដំបូងស្ទឹងត្រែង លោកនាយករដ្ឋបាលសាលាខេត្ត លោក លោកស្រី ប្រធានមន្ទីរអង្គភាពជុំវិញខេត្ត លោកប្រធានក្រុមប្រឹក្សាក្រុង-ស្រុក លោកអភិបាល នៃគណៈអភិបាលក្រុង-ស្រុក និងមន្ត្រីរាជការនៃមន្ទីរធនធានទឹក និងឧតុនិយមជាច្រើនរូបផងដែរ។
ថ្លែងក្នុងអង្គពិធី ឯកឧត្តមរដ្ឋលេខាធិការមានប្រសាសន៍ថា ពិធីនាថ្ងៃនេះពិតជាមានសារសំខាន់ដែលបានឆ្លុះបញ្ចាំងអំពីការទទួលស្គាល់ និងការយកចិត្តទុកដាក់ខ្ពស់របស់ថ្នាក់ដឹកនាំក្រសួងធនធានទឹក និងឧតុនិយម ក៏ដូចជារាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ចំពោះមន្ត្រីរាជការដែលមានស្នាដៃ គុណសម្បត្តិ សមត្ថភាព ឆន្ទៈ និងខិតខំប្រឹងប្រែងក្នុងការបំពេញតួនាទីភារកិច្ចរបស់ខ្លួនបានល្អប្រសើរ។
ជាមួយគ្នានោះដែរ ឯកឧត្តមរដ្ឋលេខាធិការ បានផ្តាំផ្ញើដល់លោក លំ សេរីគុត ប្រធានមន្ទីរធនធានទឹក និងឧតុនិយមខេត្តស្ទឹងត្រែងដែលទើបទទួលបានការតែងតាំងថ្មីនេះ សូមបន្តខិតខំបំពេញភារកិច្ចដែលថ្នាក់លើប្រគល់ជូនឱ្យអស់ពីកម្លាំងកាយចិត្ត និងបន្តដឹកនាំមន្ទីរឱ្យកាន់តែរីកចម្រើនថែមទៀត ដោយស្មារតីទទួលខុសត្រូវខ្ពស់ បង្កើនសាមគ្គីភាពផ្ទៃក្នុង បង្កើនទំនាក់ទំនងល្អជាមួយមន្ទីរ អង្គភាពជុំវិញខេត្ត ជាពិសេសជាមួយអាជ្ញាធរដែនដីគ្រប់លំដាប់ថ្នាក់ និងដៃគូអភិវឌ្ឍនានាទាំងជាតិ និងអន្តរជាតិ។
គួរបញ្ជាក់ថា លោក លំ សេរីគុត ត្រូវបានតែងតាំងជាប្រធានមន្ទីរធនធានទឹក និងឧតុនិយមខេត្តស្ទឹងត្រែង ជំនួសលោក ប៉ាង ប៉េង ដែលត្រូវបានផ្ទេរភារកិច្ចឱ្យមកបម្រើការងារនៅទីស្តីការក្រសួងធនធានទឹក និងឧតុនិយមវិញ តាមសំណើរបស់សាមីខ្លួន៕
