(ភ្នំពេញ)៖នៅរសៀលថ្ងៃព្រហស្បត៍ ១០កើត ខែភទ្របទ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី១២ ខែកញ្ញា ឆ្នាំ២០២៤នេះ នៅទីស្តីការក្រសួងធនធានទឹក និងឧតុនិយម ឯកឧត្តម ប៊ុន ហ៊ាន រដ្ឋលេខាធិការ និងជានាយកគម្រោងស្តង់ដារជាតិប្រព័ន្ធធារាសាស្រ្ត បានអនុញ្ញាតឱ្យលោក Masazimi TOKUWAKA ប្រធានក្រុមទីប្រឹក្សាបច្ចេកទេសប្រចាំគម្រោងស្តង់ដារជាតិប្រពន្ធ័ធារាសាស្ត្រ ដែលត្រូវបញ្ចប់បេសកកម្មការងារចូលជួបសម្ដែងការគួរសមនិងជម្រាបលា ដោយមានការចូលរួមពីមន្រ្តីបច្ចេកទេសជាន់ខ្ពស់របស់ទីភ្នាក់ងារកិច្ចសហប្រតិបត្តិការអន្តរជាតិជប៉ុន(JICA) ប្រចាំព្រះរាជាណាចក្រកម្ពុជា និងជំនាញការក្នុងគម្រោងផងដែរ។
ឯកឧត្តមរដ្ឋលេខាធិការបានឱ្យដឹងថា កិច្ចជំនួបនេះមានគោលបំណងដើម្បីរាយការណ៍ពីវឌ្ឍនភាពការងារគម្រោងដែលបានអនុវត្តក្នុងរយៈពេលជាង ២ឆ្នាំ កន្លងមក និងស្នើសុំកិច្ចសហការបន្ត ព្រមទាំងគាំទ្រដល់ប្រធានទីប្រឹក្សាបច្ចេកទេសថ្មីរបស់គម្រោង ដែលនឹងបន្តការងារគម្រោងរហូតបញ្ចប់គម្រោងនៅក្នុងខែមីនា ឆ្នាំ២០២៦ ខាងមុខនេះ។ ឯកឧត្តមរដ្ឋលេខាធិការបានបញ្ជាក់ពីការទទួលយកសំណើនេះ ហើយនឹងខិតខំបន្តកិច្ចសហការក្នុងការរៀបចំស្តង់ដារជាតិប្រព័ន្ធធារាសាស្ត្រឱ្យបានចប់សព្វគ្រប់ស្របតាមផែនការកំណត់។
សូមបញ្ជាក់ថា គម្រោងរៀបចំស្តង់ដារជាតិប្រព័ន្ធធារាសាស្ត្រមានរយៈពេល ៤ឆ្នាំ ដែលចាប់ផ្តើមដំណើរការសកម្មភាពគម្រោងនៅក្នុងខែមីនា ឆ្នាំ២០២២ ហើយនឹងបញ្ចប់នៅក្នុងឆ្នាំ២០២៦ ខាងមុខ៕