(ភ្នំពេញ)÷នៅទីស្តីការក្រសួងធនធានទឹក និងឧតុនិយម, នាថ្ងៃពុធ ១២កើត ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២១ ខែកុម្ភៈ ឆ្នាំ២០២៤ ឯកឧត្តម ប៉ុញ សច្ច: រដ្ឋលេខាធិការក្រសួងធនធានទឹក និងឧតុនិយម ដោយមានការចូលរួមពី ឯកឧត្តមអគ្គាធិការ ឯកឧត្តមអគ្គនាយកកិច្ចការបច្ចេកទេស និងលោកប្រធាននាយកដ្ឋាន នៃក្រសួងធនធានទឺក និងឧតុនិយម បានទទួលជួបពិភាក្សាការងារជាមួយលោក Bongwoo Shin នាយកមជ្ឈមណ្ឌលអន្តរជាតិសម្រាប់សន្តិសុខទឹក និងការគ្រប់គ្រងដោយនិរន្តរភាព និងលោកស្រី Sukkyung Sung ប្រធានក្រុមការងារ នៃUNESCO i-WSSM។
ឯកឧត្តមរដ្ឋលេខាធិការមានប្រសាសន៍ថា ក្រសួងបរិស្ថាន នៃសាធារណរដ្ឋកូរ៉េបានផ្តល់ជំនួយអភិវឌ្ឍន៍ផ្លូវការ(ODA) ដល់ក្រសួងធនធានទឹក និងឧតុនិយមលើគម្រោងពង្រឹងសមត្ថភាពរបស់មន្ត្រីក្នុងការអង្កេតជលសាស្ត្រចាប់ពីឆ្នាំ២០២១ ដល់ឆ្នាំ២០២៣។
ជាលទ្ធផលនៃកិច្ចជំនួបពិភាក្សាការងារ ឯកឧត្តមរដ្ឋលេខាធិការបញ្ជាក់ថា ទី១) ភាគីកូរ៉េនឹងបន្តផ្តល់ជំនួយដល់កម្ពុជា តាមរយៈគម្រោងជំនួយអភិវឌ្ឍន៍ផ្លូវការ(ODA) សម្រាប់ឆ្នាំ២០២៥ ដោយត្រូវរៀបចំផែនការស្នើសុំទៅកូរ៉េឱ្យបានរួចរាល់មុនពេល ១០ខែទៀត។ ទី២) ភាគីកូរ៉េ UNESCO i-WSSM បានទទួលយកនូវសំណូមពរ ដើម្បីពិភាក្សាជាមួយ K-Water ក្នុងការស្នើសុំបង្កើតវិទ្យាស្ថានអង្កេតជលសាស្ត្រកម្ពុជា(CIHS)។ និង ទី៣) ភាគីកូរ៉េ UNESCO i-WSSM នឹងបង្កើនជំនួយក្នុងការពង្រឹងសមត្ថភាព បច្ចេកទេសថ្មីៗដល់កម្ពុជាលើផ្នែកជលសាស្រ្តឱ្យកាន់តែប្រសើរឡើង។
ក្នុងឱកាសនោះ ឯកឧត្តមរដ្ឋលេខាធិការ បានសំណូមពរឱ្យភាគីកូរ៉េជួយសិក្សាពីសក្តាពលទឹកនៅតាមអាងទន្លេ ដើម្បីរៀបចំផែនការប្រើប្រាស់ទឹកឱ្យបានត្រឹមត្រូវក្នុងបរិបទនៃការប្រែប្រួលអាកាសធាតុ។ ជាមួយគ្នានេះ ឯកឧត្តមរដ្ឋលេខាធិការ បានថ្លែងអំណរគុណដល់ប្រទេសកូរ៉េ និងក្រុមការងារនៃគម្រោង ដែលបានជួយនិងសហការល្អនាពេលកន្លងមក និងបានស្នើឱ្យភាគីកូរ៉េ បន្តជួយគម្រោង ODA នេះឱ្យបានខ្លាំងថែមទៀត ដើម្បីជួយពង្រឹងសមត្ថភាពមន្ត្រីឱ្យកាន់តែប្រសើរឡើង ដោយមានតម្រូវការជាឧបករណ៍ជលសាស្រ្ត និងសម្ភារ:បច្ចេកទេសថ្មីៗ និងអាចសិក្សាសក្តានុពលទឹកជាគំរូសាកល្បងក្នុងអាងទន្លេណាមួយសិន មុននឹងពង្រីកទៅតំបន់ផ្សេងទៀត។
សូមបញ្ជាក់ថា កិច្ចជំនួបនេះក៏មានការពិភាក្សាផ្លាស់ប្តូរបទពិសោធន៍គ្នាទៅវិញទៅមក ក្នុងការដោះស្រាយបញ្ហានានាដែលបានជួបប្រទះកន្លងមក ដើម្បីបង្កើនកិច្ចសហប្រតិបត្តិការឱ្យកាន់តែល្អថែមទៀត៕
