(ភ្នំពេញ)÷នៅព្រឹកថ្ងៃអង្គារ ១១កើត ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២០ ខែកុម្ភៈ ឆ្នាំ២០២៤ នៅសាលប្រជុំរំដួល នាទីស្តីការក្រសួងធនធានទឹក និងឧតុនិយម ឯកឧត្តម ចាន់ យុត្ថា រដ្ឋលេខាធិការ បានអញ្ជើញដឹកនាំកិច្ចប្រជុំអនុគណៈកម្មការធ្វើបច្ចុប្បន្នកម្មការរៀបចំ និងការប្រព្រឹត្តទៅរបស់ក្រសួងធនធានទឹក និងឧតុនិយមជាលើកទី៣ ដើម្បីពិនិត្យកែសម្រួលលើតួនាទី និងភារកិច្ចគ្រប់នាយកដ្ឋានចំណុះក្រសួងឱ្យស្របទៅនឹងគោល នយោបាយជាតិ ការរីកចម្រើន និងតម្រូវការលើការគ្រប់គ្រង និងអភិវឌ្ឍន៍វិស័យធនធានទឹក និងឧតុនិយម ជាពិសេស យុទ្ធសាស្រ្តបញ្ចកោណរបស់រាជរដ្ឋាភិបាលនីតិកាលទី៧ នៃរដ្ឋសភា។
សូមជម្រាបថា កិច្ចប្រជុំនេះ មានការចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយកកិច្ចការរដ្ឋបាល អគ្គនាយកកិច្ចការបច្ចេកទេស អគ្គាធិការ ប្រធាននាយកដ្ឋាន និងប្រធានមជ្ឈមណ្ឌល ជាសមាជិកអនុគណៈកម្មការទាំងអស់ចំណុះក្រសួងធនធានទឹក និងឧតុនិយម។
ឯកឧត្តមរដ្ឋលេខាធិការមានប្រសាសន៍ឱ្យដឹងថា កិច្ចប្រជុំបានពិនិត្យ និងវិភាគលើមុខងារ និងភារកិច្ចរបស់ស្ថាប័ននីមួយៗក្រោមសមត្ថកិច្ចរបស់ក្រសួង ដើម្បីប្រមូលធាតុចូលបន្ថែម ក្នុងគោលដៅគ្របដណ្តប់គ្រប់ជ្រុងជ្រោយទាំងទិដ្ឋភាពច្បាប់ និងបច្ចេកទេស នៃការគ្រប់គ្រងវិស័យ និងមានលក្ខណៈស៊ីសង្វាក់ និងគាំទ្រដល់វិស័យដទៃ។
កិច្ចប្រជុំបានបញ្ចប់នៅព្រឹកថ្ងៃដដែលក្រោមបរិយាកាសរីករាយ និងស្និទ្ធស្នាល៕
