(ភ្នំពេញ)÷នាព្រឹកថ្ងៃអង្គារ ៥ កើត ខែភទ្របទ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃ១៩ ខែកញ្ញា ឆ្នាំ២០២៣ ឯកឧត្តម កើត ឆែ អភិបាលរងរាជធានីភ្នំពេញ បានអញ្ជើញចូលរួមជាអធិបតីក្នុងនាមឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងពិធីបើក «វគ្គបណ្តុះបណ្តាលស្តីពីការងាររបៀប និងការគ្រប់គ្រងឯកសារ» ប្រារព្ធឡើងនៅសាលប្រជុំ នៃសាលារាជធានីភ្នំពេញ។

ឆ្លៀតក្នុងឱកាសនេះ ឯកឧត្តម កើត ឆែ សូមវាយតម្លៃខ្ពស់ចំពោះទីចាត់ការគ្រប់គ្រងធនធានមនុស្ស និងលោកស្រី ដោ សម្ផស្ស នាយិកាទីចាត់ការរដ្ឋបាល នៃសាលារាជធានីភ្នំពេញ និងជាគ្រូឧទ្ទេសនាថ្ងៃនេះ ចំពោះការរៀបចំវគ្គបណ្តុះបណ្តាលស្តីពីការងាររបៀប និងការគ្រប់គ្រងឯកសារដែលជាប្រធានបទដ៏មានសារៈសំខាន់ សម្រាប់បុគ្គលិក-មន្ត្រីរាជការ នៃរដ្ឋបាលរាជធានីភ្នំពេញ រដ្ឋបាលខណ្ឌ​ និងរដ្ឋបាលសង្កាត់ ដើម្បីយកទៅអនុវត្តក្នុងការងារប្រចាំថ្ងៃ នៅតាមអង្គភាពរៀងៗខ្លួន ឱ្យស្របតាមគោលការណ៍ណែនាំរបស់ក្រសួងមហាផ្ទៃ។ ជាមួយគ្នានេះ ឯកឧត្តម កើត ឆែ ក៏បានពន្យល់ និងចែករំលែកបន្ថែមអំពីសារៈសំខាន់ នៃការងាររបៀបដែលធានានូវដំណើរការជាប្រក្រតី​ នៃរដ្ឋបាលសាធារណៈ, ការគ្រប់គ្រងឯកសារដែលធានានូវភាពងាយស្រួលក្នុងការរកឯកសារឡើងវិញ និងការរក្សាទុកឯកសារអេឡិចត្រូនិចក៏ត្រូវតែមានការទុកដាក់ឱ្យបានគត់មត់ផងដែរ។

មុននឹងបញ្ចប់ ឯកឧត្តម បានស្នើសិក្ខាកាមទាំងអស់ ត្រូវយកចិត្តទុកដាក់ និងចូលរួមឱ្យបានពេញលេញ ក្នុងនោះ ត្រូវកត់ត្រាទុកនូវចំណុចសំខាន់ៗ ដែលគ្រូឧទ្ទេសធ្វើបទបង្ហាញ និងត្រូវលើកនូវបញ្ហាប្រឈមដែលបានជួបប្រទះនាពេលកន្លងមក ក័ដូចជាចោទជាសំណួរផ្សេងៗដែលពាក់ព័ន្ធនឹងប្រធានបទ ដើម្បីឱ្យគ្រូឧទ្ទេសធ្វើការពន្យល់បកស្រាយ។