(ភ្នំពេញ)÷នៅថ្ងៃព្រហស្បតិ៍ ១៤រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៤ ខែកញ្ញា ឆ្នាំ២០២៣ នៅទីស្តីការក្រសួងសុខាភិបាល បានបើកកិច្ចប្រជុំដឹកនាំដោយឯកឧត្តមវេជ្ជបណ្ឌិត ម៉ី សំបូរ រដ្ឋលេខាធិការប្រចាំការ ឯកឧត្តមសាស្រ្តាចារ្យ ហ៊ុន ចំរើន ទីប្រឹក្សាសម្តេចធិបតីនាយករដ្ឋមន្រ្តី និងជាអគ្គនាយករងមន្ទីរពេទ្យកាល់ម៉ែត លោកជំទាវឱសថការី វ៉ា ពុធនាថ រដ្ឋលេខាធិការក្រសួងសុខាភិបាល ព្រមទាំងមានការអញ្ជើញចូលរួមពីឯកឧត្តម លោកជំទាវថ្នាក់ដឹកនាំ និងលោក លោកស្រីមន្ត្រីបច្ចេកទេសនៃនាយកដ្ឋានជំនាញ ព្រមទាំងតំណាងគណៈឱសថការីកម្ពុជា ដើម្បីពិនិត្យមើលប្រកាសពាក់ព័ន្ធ និងធ្វើបច្ចុប្បន្នភាពរួមគ្នាជា “ប្រកាស ស្តីពីការគ្រប់គ្រងការផ្សព្វផ្សាយផលិតផលឱសថ ចំណីអាហារ បរិក្ខារពេទ្យ គ្រឿងសម្អាង និងផលិតផលសម្រាប់ចិញ្ចឹមទារក និងកុមារ ” ក្នុងគោលបំណងទប់ស្កាត់ និងលុបបំបាត់នូវការផ្សព្វផ្សាយផលិតផលឱសថ និងផលិតផលពាក់ព័ន្ធដទៃទៀត ជាពិសេសការផ្សព្វផ្សាយតាមបណ្តាញសង្គម ដោយពុំមានការអនុញ្ញាតពីក្រសួងសុខាភិបាល ដែលធ្វើឱ្យប្រជាជនមានការយល់ច្រលំ។

ឯកឧត្តមសាស្រ្តាចារ្យរដ្ឋមន្រ្តី នឹងបន្តជម្រុញការចូលរួមអនុវត្តឲ្យទទួលបានជោគជ័យនូវកម្មវិធីគោលនយោបាយអាទិភាពចំនួន៦ របស់រាជរដ្ឋាភិបាល ក្នុងនីតិកាលទី ៧ នៃរដ្ឋសភា ហើយសម្រាប់ការចាប់ផ្តើមអនុវត្តភ្លាមក្នុងឆ្នាំ២០២៣ ក្នុងនោះអាទិភាពទីមួយគឺ “ការពង្រីកសេវាថែទាំសុខភាពឆ្ពោះទៅរកការគ្របដណ្តប់សុខភាពជាសកល”។ ស្របគ្នានេះដែរ ឯកឧត្តមសាស្រ្តាចារ្យរដ្ឋមន្រ្តី ក៏បានដាក់ចេញនូវយុទ្ធសាស្ត្រ សំខាន់ៗ ចំនួន៩ ដែលក្នុងនោះសកម្មភាពពង្រឹងការអនុវត្តនិយ័តកម្ម ឱសថ គឺជាការងារចាំបាច់។