ភ្នំពេញ÷នាថ្ងៃអង្គារ ៨រោច ខែផល្គុន ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៤ ខែមីនា ឆ្នាំ២០២៣ អនុគណៈកម្មការសំណេះសំណាលជាមួយយុវជន នៃក្រសួងកិច្ចការនារី បានរៀបចំកិច្ចសន្ទនាយុវជន ដើម្បីចូលរួមអបអរសាទរទិវា អន្តរជាតិនារី ៨មីនា ខួបលើកទី១១២ ឆ្នាំ២០២៣ ក្រោមប្រធានបទស្តីពី «ស្រ្តីរួមគ្នា រក្សាសុខសន្តិភាព ដើម្បីកិច្ចអភិវឌ្ឍក្នុងយុគសម័យឌីជីថល» ក្រោមអធិបតីភាព ដ៏ខ្ពង់ខ្ពស់របស់ លោកជំទាវកិត្តិបណ្ឌិត អុឹង កន្ថាផាវី រដ្ឋមន្រ្តីក្រសួងកិច្ចការនារី នៅអគារ CJCC រាជធានីភ្នំពេញ។ កម្មវិធីនេះមានគោលបំណង៖ បង្កើនការយល់ដឹង ជូនសាធារណៈជន ជាពិសេសយុវជន ពីសារៈសំខាន់នៃការចូលរួមរបស់ស្រ្តីក្នុងការថែរក្សាសុខសន្តិភាព និងលើកកម្ពស់កិច្ចអភិវឌ្ឍក្នុងយុគសម័យឌីជីថល ។និងផ្តល់ឱកាសដល់យុវជននៅ តាមសកលវិទ្យាល័យ,វិទ្យាល័យ, សហភាពសហព័ន្ធ យុវជនកម្ពុជា, និងអង្គការដៃគូ ចូលរួមជាវាគ្មិនកិត្តិយស ធ្វើការសិក្សាស្រាវជ្រាវ ស្វែងយល់ បំផុសគំនិត និងប្រើប្រាស់សក្តានុពលរបស់ខ្លួន និងស្វែងរកគំនិតថ្មីៗ ក្នុងការលើកកម្ពស់ សមភាពយេនឌ័រ និងបង្កើនភាពអង់អាច ដល់ស្រ្តី ដើម្បីឆ្ពោះទៅរកការអភិវឌ្ឍប្រកបដោយចីរភាពក្នុងយុគសម័យឌីជីថល។

នៅក្នុងឱកាសនោះផងដែរ លោកជំទាវកិត្តិបណ្ឌិតរដ្ឋមន្រ្តី បានបញ្ជាក់ថា កម្មវិធីកិច្ចសន្ទនាជាមួយយុវជននាថ្ងៃនេះ មិនត្រឹមជាសកម្មភាពមួយ ក្នុងការចូលរួម អបអរសាទរទិវាអន្តរជាតិ ៨មីនា ឆ្នាំ២០២៣នេះប៉ុណ្ណោះទេ ប៉ុន្តែជាកិច្ចការមួយរបស់ក្រសួងកិច្ចការនារី ក្នុងការលើកកម្ពស់ការចូលរួមរបស់យុវជន ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្រ្តីនិងក្មេងស្រី គ្រប់រូប ដែលកិច្ចការនេះ គឺជាគុណតម្លៃនិងការទទួលរបស់យើងម្នាក់ៗ និងគ្រប់ៗគ្នា។ - Gender Equality is Everyone Value and Business!

សមាសភាពចូលរួមក្នុងកម្មវិធីរួមមាន លោកជំទាវ ឯកឧត្តម ជាថ្នាក់ដឹកនាំ និងមន្រ្តីរាជការក្រសួងកិច្ចការនារី, អគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីស្ត្រី, តំណាងស្ថានទូតចិន, តំណាងសហភាពសហព័ន្ធយុវជនកម្ពុជា, អង្គការដៃគូ,វិស័យឯកជន, សិស្ស-និស្សិត និង សាស្រ្តាចារ្យ សរុបចំនួន ៣៥០នាក់ ស្រ្តី ២៣៦នាក់។